नित्योपासना - सोमवार - सायं स्मरण

ॐ नम: शिवाय

परमपूज्य आई श्रीकलावतीदेवी  

भजन - सदगुरुनाथे माझे आई । मजला ठाव द्यावा पायी ॥

१) श्रीशिवगौरीप्रियनंदना । पूर्ण करीं मनकामना ॥धृ०॥
चौदेहाच्या चौरंगी बसवुनि । पूजिन तुज विघ्नविनाशना ॥१॥
अनन्यभक्तिजले स्नान घालुनि । चरणी वाहीन सुमना ॥२॥
वासनाशेंदूर अंगा लावीन । धूप अहंभावना ॥३॥
रजोगुणात्मक लाल पीतांबर । नेसविन मूषकवाहना ॥४॥
पंचविषय ह्या दूर्वा तुज म्या । अर्पिन सुरनरवंदना ॥५॥
नंदादीप अखंड ध्यानाचा । कर्पूर समूळ दुर्भावना ॥६॥
सुप्रेमाचा मोदक भक्षी । सत्वरि कलिमलदहना ॥७॥

भजन - पार्वतीच्या नंदना मोरया, गजानना गजवदना ॥

२) सुंदरे गुणमंदिरे करुणाकरे कमलोदभवे । सिध्दचारणपूजिते जनवंदिते महावैष्णवे ।
त्राहि वो मज, त्राहि वो मज पाहि वो महालक्षुमी । हेमबावन रत्नकोंदन ते सिंहासन आसनी ॥१॥

एक एक विचित्र माणिक जोडिले मुगुटावरी । त्यासी देखुनि लोपला शशी चालिला गगनोदरी ।
कुंडले श्रवणी रविशशी - मंडलासह वर्तुळे । बोलता सुरनायकावरी हालताती चंचळे ॥२॥

कंचुकी कुचमंडलावरी हार चंपक रुळती । पारिजातक शेवंती बटमोगरा आणि मालती ।
पिवळा पट तो कटितटि वेष्टिला बरवे परी । सौदामिनिहुनि तेज अधिक शोभते उदरावरी ॥३॥

कामुकावरी मन्मथेश्वर सज्जिले तैशां निर्या । गर्जति पदपंकजे किती नूपुरे आणि घागर्या ।
इंद्र चंद्र महेंद्र नारद पादपंकज अर्चिती । कुंकुमागरु कस्तुरी प्रीति आदरे तुज चर्चिती ॥४॥

निर्जरे तुज पूजिले बहु शोभसी कमलासनी । किती हो तुज वर्णु मी मज पाव गे कुलस्वामिनी ।
कोटि तेहतीस देवता सह घेउनि विंझण करी। चामरे चिरपल्लवे तुज ढाळिती परमेश्वरी ॥५॥

नामामृत दे निरंतर याचकाप्रति गिरिसुते। जोडुनि कर विनवितो तुज पाव गे वरदेवते ।
संकटी तुजवाचुनि मज कोण रक्षिल अंबिके। गोसावीनंदन प्रार्थितो तुज पाव गे जगदंबिके ॥६॥

भजन - आनंदे गुरुमाय । निजानंदे गुरुमाय । सच्चिदानंदे गुरुमाय । पूर्णानंदे गुरुमाय ॥

३) संतदर्शने महालाभ जाहला ।
ह्रदयगृही आनंदकंद पाहिला ॥धृ०॥
मी माझे म्हणुनि भ्रमे फिरत होतो भारी । दैवयोगे पातलो संतमहाद्वारी ॥१॥
सापडुनि होतो गौडबंगाल जाली । सदय संतमायबापे मोकळीक केली ॥२॥
बहुत जन्मार्जित भाग्य उदया आले । संतकृपे आजि माझे निजरुप समजले ॥३॥
भ्रमर सुवासासि लुब्ध मक्षिका मधासि । तेचि चित्त गोवियेले आत्मह्रषीकेशी ॥४॥
अणुरेणुपासुनि विश्वि कृष्ण संचला । भक्तकामकल्पतरु दास मनी राहिला ॥५॥

भजन - शांत किती हा सदगुरुमूर्ति । पाहता मावळे द्वैतभ्रांति ॥

४) गुरुने अमल पिलायाजी । मुझकु गरक सुलायाजी ॥धृ०॥
आगम निगमकी बुट्टी गहिरा गुरुबचनका पानी । मनकुंडीमे खूब घोंटकर आत्मग्यानसे छानी ॥१॥
नैन अगोचर मुद्रा चढकर उलटा महल देखो । व्हांके अंदर मूरत बैठी रुप नही वा रेखो ॥२॥
निरंजन रघुनाथगुरुने एकहि बात सुनाई । मेरा चेहरा मुझे बताया आपोआप भुलाई ॥३॥

भजन - सीताराम जय जय राम । हरेराम, राम, राम, राम॥

५)ॐ नमः शिवाय ॐ नमः शिवाय ॐ नमः शिवाय वद, वद, वद रे ।
पावशी सच्चिदानंदपद रे । मनुजा ॥धृ०॥
लक्षचौर्यांशी योनी फिरता । अवचित नरतनु आली हाता ।
पुनरपि न मिळे ही जाणुनि ताता । गुरुसी वरी होउनि सदगद रे ॥१॥
विषय विषापरि वाटता तुज । गुरुपदी अनन्य होशी सहज । गुरुकृपेने कळता निजगुज । तरशिल भवसागर दुःखद रे ॥२॥
वेदशास्त्रे पुराणादिक । आणिक संत सनकादिक । गुरुविण गति नाही म्हणती सकळिक । गुरुवचने रुक्मिणी सावध रे ॥३॥

भजन - उपेंद्रा भक्तचकोरचंद्रा । सत्वरि धाव बा ॥

६)आरुढ, सत्पदारुढ, तमोमय मूढ जगी जन भरला,
त्या मुक्त कराया, सांबचि जऊ अवतरला ॥धृ०॥
जरि रोड आकृति गोड, पाहता कोड, पुरति नेत्रांचे ।
तदभाषण वाटे सार ब्रह्मसूत्राचे ॥
मनि शांति, मुखावरि कांति, घालवी भ्रांति प्रणत लोकांची ।
या अल्पमुखे मी स्तुति करु केवी त्यांची । चाल ।
कुणी म्हणती जातीने वाणी, त्याजला ।
कुणी म्हणती कोष्टिकुलवंशी जन्मला ।
परि अधिक द्विजाहुनि वाटे तो मंला ।
समदृष्टि, सदासंतुष्टि, असो तो कोष्टि, विप्र की वाणी ।
तो वंद्यचि मजला, चिद्रत्नांची खाणी ॥१॥
बहु दिवस असा सहवास, कराया नवस चित्त करी माझे ।
तो योग आणिला सहजचि सदगुरुराजे ।
संगति ज्याचि सदगति, देउनि मति, शुद्ध करी खासी ।
तो राहुनि येथे, हुबळीची करी काशी चाल ।
असतील शेकडो ज्ञानी, महिवरी ।
मुक्तचि झाले स्वज्ञाने ते जरि ।
उपकारी क्वचितचि असतील यापरि ।
शिशुपरी खेळ कुणि करी, वदत वैखरी, पिशापरि कोणी ।
कुणि बसति मुक्यापरि, स्तंभुनि आपुली वाणी ॥२॥
ही माय दुभति गाय, वंदिता पाय, ज्ञानपय देई ।
गुण अंग जातिकुळ काळवेळ नच पाही ।
जन भरति ऐकुनि कीर्ति, पहाया मूर्ति रथावरि ज्याची ।
दरवर्षी भरे ती जत्रा कशी मौजेची ।
चाल । प्रार्थना जनांनो तुम्ही आईका ।
हा कल्पतरु तुम्हाला लाभला फुका ।
ही संधि वाया जाऊ देऊ नका ।
जा शरण, धरा तच्चरण, व्हावया तरण, भवांबुधिमाजि ।
ही कृष्णसुताची, विनंति ऐकुनि घ्याजि ॥३॥

भजन -ॐ नमः शिवाय, तरणोपाय, सुलभ उपाय, तारकमंत्र गुरुंचा ॥

७) मै गुलाम मै गुलाम मै गुलाम तेरा ।
तू साहेब मेरा सच्चा नाम लेऊं तेरा ॥धृ०॥
रुप नही रंग नही नही बरन छाया
निर्विकार निर्गुन तू एक रघुराया ॥१॥
एक रोटी दे लंगोटी द्वार तेरा पावूं ।
काम क्रोध छोडकर हरिगुण गाऊं ॥२॥
मेहेरबान मेहेरबान मेहेर करो मेरी ।
दास कबीर चरण खडा नजर देख तेरी ॥३॥

भजन - बेळगांव शहरी अनगोळमाळी श्रीहरिमंदिरात
तेथे हरि प्रत्यक्ष नांदतो काय सांगू मात ॥१॥
हरिनामाचा गजर होतो तेथे दिनरात ।
बंधुभगिनी सर्व मिळोनि अमोघ लाभ घेत ॥२॥
आमुचा हरि कृपादृष्टीने आम्हाकडे पहात ।
पाप ताप दुःख संकटे हरिला भिउनि पळत ॥३॥

८) माझी देवपूजा देवपूजा । पाय तुझे गुरुराजा ॥१॥
गुरुचरणाची माती । तीच माझी भागीरथी ॥२॥
गुरुचरणाचा बिंदु । तोचि माझा क्षीरसिंधु ॥३॥
गुरुचरणाचे ध्यान । तेचि माझे संध्या - स्नान ॥४॥
शिवदिन केसरिपायी । सदगुरुवाचुनि दैवत नाही ॥५॥

भजन - सदगुरुमाय दाखवि पाय । तुजविण गमेना करु मी काय ॥

अर्जी

गुरुराया तव चरणदास मी अर्जी ऐकावी । दयाळा, अर्जी ऐकावी ॥धृ०॥
मी अनाथ मज सनाथ करुनि लज्जा रक्षावी ।
दयाळा, उपेक्षा नसावी । चाल ।
तवपदकमली अनन्यभक्ति सतत दृढसावी ।
दयाळा, सतत दृढसावी ॥१॥
विषयसुखाची इच्छा कदापि न मला स्पर्शावी ।
दयाळा, न मला स्पर्शावी ।
तव दिव्य ज्ञान बोधामृती मम मति घर्षावी ।
दयाळा, मम मति घर्षावी । चाल ।
तुजवाचुनिया अन्य दैवते कधी नच नवसावी ।
दयाळा, कधी नच नवसावी ॥२॥
मी माझे ही द्वैतबुद्धि स्वप्नी न वसावी ।
दयाळा, स्वप्नी न वसावी ।
स्वस्वरुपाचा अनुभव देउनि भ्रांति निरसावी ।
दयाळा, भ्रांति निरसावी । चाल ।
कलिमलदहना परमपावना तव कृपा ऐसावी ।
दयाळा, तव कृपा ऐसावी ॥३॥

भजन - जय जय पांडुरंग हरि ॥

आरती

१) आरती अनंता जय जय । आरती अनंता ॥धृ०॥
अनंत तव रुप, अनंत तव गुण । विधिहरिहरताता ॥१॥
अनंत तव नाम, अनंत तव प्रेम । तूचि कर्ताहर्ता ॥२॥
अनंत तव पद, अनंत तव कर । तारिसी तू भक्तां ॥३॥
अनंत श्रवण, अनंत नयन । काळाचा हंता ॥४॥
कलिमलदहना, सगुणनिर्गुणा । तूचि गुरुसमर्था ॥५॥

२) आरती गुरुमाई । मस्तक ठेविते पायी ॥धृ०॥
कलियुगी अवतरोनी । श्रीहरिमंदिरात ।
कलावती या नामे । प्रगटलीस आई ॥१॥
गौरवर्ण काया । सुहास्यवदन ।
शांत मूर्ति पाहता ।मन तल्लीन होई ॥२॥
चतुर्विध भक्त येती । त्यावरि समान प्रीति ।
अज्ञान निरसुनिया । देसी आनंद आई ॥३॥
भवताप निवारोनी । सुखविसी सकला ।
म्हणुनि दीन विजया । शरण आली असे पायी॥४॥

घालीन लोटांगण, वंदीन चरण, डोळ्यांनी पाहीन रुप तुझे ।
प्रेमे आलिंगीन, आनंदे पूजीन, भावे ओवाळीन म्हणे नामा ॥१॥

त्वमेव माता च पिता त्वमेव, त्वमेव बंधुः सखा त्वमेव ।
त्वमेव विद्या द्रविणं त्वमेव, त्वमेव सर्वं मम देवदेव ॥२॥

कायेन वाचा मनसेंद्रियैर्वा, बुध्द्यात्मना वा प्रकृतिस्वभावात।
करोमि यद्यत सकलं परस्म, नारायणायेति समर्पयामि ॥३॥

ॐ चैतन्यं शाश्वतं शांतं व्योमातीतं निरंजनम ।
नादबिंदुकलातीतं तस्मै श्रीगुरुवे नमः । गुरवे नमः । गुरवे नमः ॥

गुरुपादुकाष्टक

दयावंत कृपावंत सद्गुरुराया | अनन्यभावे शरण आलो मी पाया | भवभ्रमातुनि काढी त्वरे या दीनासी | नमस्कार करितो तुझ्या पादुकांसी |१|
अनंत अपराधी मी सत्य आहे | म्हणोनि तुझा दास होऊ इच्छिताहे | तुजविण हे दुःख सांगू कुणासी |नमस्कार करितो तुझ्या पादुकांसी |२|
मतिहीन परदेशी मी एक आहे | तुजविण जगी कोणी प्रेमे न पाहे | जननी जनक इष्ट बंधु तू मजसी | नमस्कार करितो तुझ्या पादुकांसी |३|
जगतपसारा दिसो सर्व वाव | अखंडीत तव पायी मज देई ठाव | विषापरि विषय वाटो मनासी | नमस्कार करितो तुझ्या पादुकांसी |४|
तव आज्ञेसी पाळील जो एकभावे | तयासीच तू भेट देसी स्वभावे | म्हणोनि अनन्यशरण आलो मी तुजसी | नमस्कार करितो तुझ्या पादुकांसी |५|
किती दिवस गाऊ हे संसारगाणे | तुजविण कोण हे चुकविल पेणे | नको दूर लोटू चरणी थारा दे मजसी | नमस्कार करितो तुझ्या पादुकांसी |६|
सुवार्णासी सोडुनी कांति न राही | सुमनासी न सोडी सुवास पाही| तैसा मी राहीन निरंतर तुझ्या सेवेसी | नमस्कार करितो तुझ्या पादुकांसी |७|
कलावंत भगवंत अनंत देवा | मनकामना पुरवि दे अखंड तव भक्तिमेवा | कृपा करोनि मज ठेवी स्वदेशी | नमस्कार करितो तुझ्या पादुकांसी |८|


सोमवार - प्रातः स्मरण - प्रारंभी विनंति करु ...

मंगलवार - प्रातः स्मरण - उठा उठा हो वेगेसी ...

मंगलवार - सायंस्मरण - श्री गणपते | विघ्ननाशना ...

बुधवार - प्रातः स्मरण - प्रारंभी विनंति करु गणपती विद्यादयासागर ...

बुधवार - सायंस्मरण - सदगुरुनाथे माझे आई । मजला ठाव द्यावा पायी ...

गुरुवार - प्रातः स्मरण - प्रारंभी विनंति कर ...

गुरुवार - सायंस्मरण - सदगुरुनाथे माझे आई ...

शुक्रवार - प्रातः स्मरण - प्रारंभी विनंति करु गणपती विद्यादयासागरा ...

शुक्रवार - सायंस्मरण - सदगुरुनाथे माझे आई ...

शनिवार - प्रातः स्मरण - प्रारंभी विनंति करु गणपती विद्यादयासागरा ...

शनिवार - सायंस्मरण - सदगुरुनाथे माझे आई ...

रविवार - प्रातः स्मरण - प्रारंभी विनंति करु गणपती विद्यादयासागरा ...

रविवार - सायंस्मरण - सदगुरुनाथे माझे आई ...