नित्योपासना - गुरुवार - प्रातः स्मरण

ॐ नम: शिवाय

परमपूज्य आई श्रीकलावतीदेवी  

प्रारंभी विनंति करु गणपती विद्यादयासागरा । अज्ञानत्व हरोनि बुध्दि मति दे आराध्य मोरेश्वरा ॥
चिंता क्लेश दरिद्र दुःख अवघे देशांतरा पाठवी । हेरंबा गणनायका गजमुखा भक्तां बहु तोषवी ॥१॥
नेत्री दोन हिरे प्रकाश पसरे अत्यंत ते साजिरे । माथा शेंदूर पाझरे वरि बरे दूर्वांकुराचे तुरे ॥
माझे चित्त विरे मनोरथ पुरे देखोनि चिंता हरे । गोसावीसुत वासुदेव कवि रे त्या मोरयाला स्मरे ॥२॥

ॐ पूर्णमदः पूर्णमिदं पूर्णात्पूर्णमुदच्यते ।
पूर्णस्य पूर्णमादाय पूर्णमेवावशिष्यते ।
ॐ शांतिः शांतिः शांतिः ॥

गुरुर्ब्रह्मा गुरुर्विष्णुः गुरुर्देवो महेश्वरः ।
गुरुः साक्षात्परब्रह्म तस्मै श्रीगुरुवे नमः ॥

ब्रह्मानंदं परमसुखदं केवलं ज्ञानमूर्तिम । द्वंद्वातीतं गगनसदृशं तत्त्वमस्यादिलक्ष्यम ।
एकं नित्यं विमलमचलं सर्वधीसाक्षिभूतं । भावातीतं त्रिगुणरहितं सदगुरुं तं नमामि ॥

तव भक्तिलागी तनु ही झिजू दे । तव चरणकमली मन हे निजू दे ॥
तव भजनी ठेवी ही वाचा रिझाया । नमस्कार माझा तुला गुरुराया ॥१॥

१) धन्य श्रीहरिमंदिर । आमुचे धन्य श्रीहरिमंदिर ॥धृ॥
सर्वतोमुखी एकचि चाले । हरिनामाचा गजर ॥१॥
भूलोकीचा स्वर्ग असे हा । दुःख नसे तिळभर ॥२॥
बद्धजीवांचे त्रिताप निववुनि । देई सदैव आधार ॥३॥
मुमुक्षूते निजबोध देई । व्हावया भवनदीपार ॥४॥
साधका सुलभ साधन दावी । दे शांति सत्वर ॥५॥
शरणागतांसी ब्रह्मोपदेशे । जाणविते अमर ॥६॥
ज्यापासुनि मी सुखी जाहले । असो विजय निरंतर ॥७॥

भजन - गुरुराया मजवरी करी करुणा । तुजविण शरण मी जाऊ कुणा ॥

२) उठि बा पुरुषोत्तमा । भक्तकामकल्पद्रुमा ।
आत्मारामा निजसुखधामा । मेघश्यामा श्रीकृष्णा ॥१॥
भक्तमंडळी महाद्वारी । उभी तिष्टत श्रीहरि ।
जोडोनिया दोन्ही करी । तुज मुरारि पहावया ॥२॥
संत सनकादिक नारद । व्यास वाल्मिक ध्रुव प्रल्हाद ।
पार्थ पराशर रुक्मांगद । हनुमान अंगद बळीराजा ॥३॥
झाला प्रातःकाळ पूर्ण । करी पंचांग श्रवण ।
आला मुदगलभट ब्राह्मण । आशीर्वचन घे त्याचे ॥४॥
तुझा नामदेव शिंपी । घेउनि आला अंगी -टोपी ।
आता जाऊ नको बा झोपी । दर्शन देई निजभक्तां ॥५॥
नानापरीचे अलंकार । घेउनि आला नरहरि सोनार ।
आला रोहिदास चांभार । जोडा घेउनि तुजलागी ॥६॥
सुगंध सुमने पुष्पांजली । घेउनि आला सावंतामाळी ।
म्हणे श्रीहरिपदकमळी । अनन्यभावे समर्पू ॥७॥
कान्हुपात्रा नृत्य करी । टाळछंदे साक्षात्कारी ।
सेना न्हावी दर्पण करी । घेउनि उभा राहिला ॥८॥
लिंबुर हुरडा घेउनि आला । तो हा माणकोजी बोधला ।
दर्शन द्यावे बा त्याजला । भक्त भोळा म्हणवुनि ॥९॥
मीराबाई तुझेसाठी । दूध -तुपे भरुनि वाटी ।
तुझे लावावया ओठी । लक्ष लावुनि बैसली ॥१०॥
नामदेवाची जनी दासी । घेउनि आली तेलतुपासी ।
तुज न्हाऊ घालण्यासी । उभी ठेली महाद्वारी ॥११॥
गूळ -खोबरे भरुनि गोणी । घेउनि आला तुकया वाणी ।
वह्या राखिल्या कोरड्या पाणी । भिजो दिल्या नाही त्वा ॥१२॥
आला चोखामेळा महार । स्वामी करीतसे जोहार ।
त्याचा करोनिया उद्धार संतमेळी स्थापियला ॥१३॥
हरिभजनाविण वाया गेले । ते नरदेही बैल झाले ।
गोर्याकुंभारे आणिले । खेळावया तुजलागी ॥१४॥
गरुडपारी हरिरंगणी । टाळमृदंगाचा ध्वनि ।
महाद्वारी हरिकीर्तनी । तल्लिन कान्हा हरिदास ॥१५॥
निजानंदे रंगे पूर्ण सर्वहि कर्मे कृष्णार्पण । श्रीरंगा निजतनु अर्पण ।
चरणसेवा करीतसे ॥१६॥

भजन - गुरुवरा सदगुरुवरा, येउंदे करुणा तुला रे मायबाप ॥

३) सदा माझे डोळां, दिसो तुझी मूर्ति । हीच माझी आर्ति, गुरुराया ॥१॥
सदा माझे मुखी, वसो तुझे नाम । चालवावा नेम, गुरु० ॥२॥
सदा माझे कानी, तुझे गुणगान । नको त्याहुनि आन, गुरु० ॥३॥
सदा माझे हस्ते, घडो तुझी पूजा । नको भाव दुजा, गुरु० ॥४॥
सदा माझे मन, राहो तुझे ध्यानी तूच माझा धनी, गुरु० ॥५॥
कलिमलदहना, सत्यज्ञानानंता । कृपा करी आता, गुरु० ॥६॥

भजन - मजला उध्दरि सदगुरुनाथा श्रीगुरुनाथा, तू मायबाप दीनांचा ॥

४) पूरण प्रेम लगा दिलमे जब । नेमका बंधन छूट गया ॥धृ०॥
कोयी पंडितलोक बतावत है, समझावत है जगरीत नको ।
जब प्रीतमसे दृढ प्रीत भयी तब, रीतका बंधन छूट गया ॥१॥
कोयी तीरथ परसन जावत है, कोयी मंदिरमे नित दरसनको ।
घटभीतर देव दीदार हुवा तब, बाहरसे मन रुठ गया ॥२॥
कोयी जीव कहे कोयी ईश कहे कोयी, गावत ब्रह्मनिरंजनको ।
जब अंदर बाहर एक हुवा तब, द्वैतका पडदा फूट गया ॥३॥
सोही एक अनेक स्वरुप बना परिपूरण है जलमे थलमे ।
ब्रह्मानंद करे गुरुदेव दया भवसागरका भय ऊठ गया ॥४॥

भजन - जगदीशा, जय जय पुराणपुरुषा । सदगुरु धाव बा ॥

५) दत्त निरंजन गा सदोदित ॥धृ०॥
सत्यसुखाची दृढ इच्छा तरी । दृष्या भुलसी का गा ॥१॥
कामक्रोधादि घोर अरि हे । मार्गी करिति बहु दंगा ॥२॥
दत्ता विसरुनि घालिसी किती तू जन्ममरणपिंगा ॥३॥
दत्तभजनानंदी रमता । पावसि भवभंगा ॥४॥
कलिमलदहन गुरुपदकमली । यमुना सरस्वती गंगा ॥५॥

भजन - श्रीकृष्ण चैतन्यप्रभु नित्यानंदा । हरेराम हरेकृष्ण राधेगोविंदा ॥

६) श्रीगुरु दत्तात्रय अवधूत । मारी सोटा जाई भूत ॥धृ०॥
गौरवर्ण विशाल नयन, तीन शिरे सहा हात ।
रुद्राक्षमाळा कंठी विराजे, सवे श्वान भुंकत ॥१॥
खाके झोळी भगवी छाटी, अंगावरी शोभत ।
दंड कमंडलु धरी हाती, सर्वांगी विभूत ॥२॥
काशी स्नान करी करवीरी भोजन, शयन करी माउलीत ।
कलिमल दूर करोनि भक्तां, अखंड आनंद देत ॥३॥

भजन - तुमबिन गुरुजी मै निराधार । अनाथ को मुझे देवोजी आधार ॥

७) संदेशा आ गया यमका चलनकी कर तयारी है ॥धृ॥
बाल शिर के हुये धोले सपेदी आंखपर छाई ।
श्रवणसे सुन पडे उंचा दात हिलनाभी जारी है ॥१॥
कमर सब हो गयी कुबडी चले लकडी सहारे है ।
गयी सबी देहकी ताकद लगी तनमे बिमारी है ॥२॥
छुटी सब प्रीत पिरियाकी पुत्र सब हो गये न्यारे ।
बने सब मित्र मतलबके झूट लोकनकी यारी है ॥३॥
करो जगदीशका सुमरन भरोसा राखके मनमे ।
वो ब्रह्मानंद है तेरा एकहि सहायकारी है ॥४॥

भजन - सच्चिदानंद कृष्ण सच्चिदानंद ॥

८) जाणो सदगुरुपाय आम्ही ॥धृ०॥
गुरुचरणाविण या भवसागरी । नाही तरणोपाय ॥१॥
कर्म धर्म व्रत तीर्थे नेणो । न जाणो अन्य उपाय ॥२॥
अमृत त्यजुनि कांजी पिणे । कोण करील व्यवसाय ॥३॥
सिद्धारुढपदी शिर नमविता । कलिमल दूर जाय ॥४॥

भजन - चला चला रे सर्व मिळोन श्रीहरिमंदिरी जाऊ, तेथे हरिनाम घेऊ । माळ हरिगळां वाहू ॥

९) शेवट गोड करी । गुरुराया ॥धृ०॥
पंचविषयी आसक्त होउनि । बनलो मी अविचारी ॥१॥
अनन्यभक्ति दान देउनि । करी मज सुविचारी ॥२॥
तवपदकमलामोद सेवुनि । राहीन निरंतरी ॥३॥
कलिमलदहना पदरी घे दीना । तूचि माझा कैवारी ॥४॥

भजन - महाराज सिध्दारुढ माउली ॥

आरती

१) काकड आरती माझ्या प्रेमळ सिध्दा ओवाळू । अनन्यभावे शरण जाउनि आज्ञेसी पाळू ॥धृ०॥
तुजविण कोणी न वाली म्हणुनि तत्पायी लोळू । गुरुचरणाच्या बळकट ध्यासे विघ्नाते टाळू ॥१॥
ओल नाही ते फोल बोलणे क्षणोक्षणी गाळू । गुरुगुण सुंदर गीत सदोदित ह्रदयात घोळू ॥२॥
सदभाव सदभक्तिचा अरि दुःसंग वगळू । सदा गुरुभजनी रत होउनि निंदास्तुति गिळू ॥३॥
अहर्निशी गुरुबोधश्रवणे द्वैतभाव कोळू । कलिमलदहनकृपामृत पिउनि निजानंदे डोलू ॥४॥

२) ओवाळू आरती माता कलावती । पहाता तुझी मूर्ति मनकामनापूर्ति ॥धृ०॥
भावे वंदिता तव दिव्य पाउले । संसारापासुनि माझे मन भंगले ॥
तुझ्या भजनी नित चित्त रंगले । झाली ह्रत्तापाची पूर्ण शांति ॥१॥
गौरवर्ण तनुवरि शोभे शुभ्र अंबर । दर्शनमात्रे लाभे आनंद थोर ॥
भाषणे सकल संशय जाती दूर । विशालाक्ष मज दे गुणवंती ॥२॥

घालीन लोटांगण, वंदीन चरण, डोळ्यांनी पाहीन रुप तुझे ।
प्रेमे आलिंगीन, आनंदे पूजीन, भावे ओवाळीन म्हणे नामा ॥१॥
त्वमेव माता च पिता त्वमेव, त्वमेव बंधुः सखा त्वमेव ।
त्वमेव विद्या द्रविणं त्वमेव, त्वमेव सर्वं मम देवदेव ॥२॥
कायेन वाचा मनसेंद्रियैर्वा, बुध्द्यात्मना वा प्रकृतिस्वभावात ।
करोमि यद्यत सकलं परस्मै, नारायणायेति समर्पयामि ॥३॥

नमोऽस्तु अनंताय, सहस्त्रमूर्तये, सहस्त्रपादाक्षशिरोरुबाहवे, सहस्त्रनाम्ने पुरुषाय शाश्वते, सहस्त्रकोटीयुगधारणे नमः ॥

विज्ञापना

हे विश्वजनका, विश्वंभरा, विश्वपालका, विश्वेश्वरा !
माझ्या मनाची चंचलता दूर कर.

हे सर्वव्यापी, सर्वसाक्षी, सर्वोत्तमा, सर्वज्ञा !
तुला ओळखण्याचे मला ज्ञान दे .

हे प्रेमसागरा, प्रेमानंदा, प्रेममूर्ते, प्रेमरूपा !
माझे दुर्गुण नाहीसे करून शुद्ध प्रेमाने हृदय भरू दे.

हे ज्ञानेशा, ज्ञानमुर्ते, ज्ञानांजना, ज्ञानज्योति !
तुझ्या चरणी माझी श्रद्धा, भक्ती द्रुढ कर.

हे मायातीता, मायबापा, मायाचालका, मायामोहहरणा !
समदृष्टी आणि अढळ शांति मला दे .

हे कमलनयना, कमलाकांता, कमलानाथा, कमलाधीशा !
माझ्या नेत्रांना सर्व स्थावर-जंगमात तुझे दर्शन घडू दे .
माझे कान तुझे कीर्तन श्रवण करू देत.

हे पतितपावना, परमेशा, परमानंदा, परमप्रिया !
माझ्या हस्ताने तुझी पूजा घडू दे.
तुझ्याभोवती माझे पाय प्रदक्षिणा घालू देत.

हे गुरुनाथा, गुरुमूर्ते, गुरुराजा, गुरुदेवा !
माझे मन निरंतर तुझे ध्यान करू दे.
तुझ्या चरणकमली मला अखंड थारा दे.

सोमवार - प्रातः स्मरण - प्रारंभी विनंति करु ...

सोमवार - सायंकाल स्मरण - सदगुरुनाथे माझे आई ...

मंगलवार - प्रातः स्मरण - उठा उठा हो वेगेसी ...

मंगलवार - सायंस्मरण - श्री गणपते | विघ्ननाशना ...

बुधवार - प्रातः स्मरण - प्रारंभी विनंति करु गणपती विद्यादयासागर ...

बुधवार - सायंस्मरण - सदगुरुनाथे माझे आई । मजला ठाव द्यावा पायी ...

गुरुवार - सायंस्मरण - सदगुरुनाथे माझे आई ...

शुक्रवार - प्रातः स्मरण - प्रारंभी विनंति करु गणपती विद्यादयासागरा ...

शुक्रवार - सायंस्मरण - सदगुरुनाथे माझे आई ...

शनिवार - प्रातः स्मरण - प्रारंभी विनंति करु गणपती विद्यादयासागरा ...

शनिवार - सायंस्मरण - सदगुरुनाथे माझे आई ...

रविवार - प्रातः स्मरण - प्रारंभी विनंति करु गणपती विद्यादयासागरा ...

रविवार - सायंस्मरण - सदगुरुनाथे माझे आई ...